Հալեպում հայերը ավազակային հարձակումներից պաշտպանվելու համար ինքնապաշտպանական խմբեր են ստեղծել
20:22 18.08.2012
Հնարավոր ավազակային հարձակումներից պաշտպանվելու համար Հալեպի հայկական թաղամասում ինքնապաշտպանական խմբեր են ստեղծվել։
Այս մասին TVKET-ի թղթակցին տեղեկացրեց Հալեպի աղբյուրը՝ նշելով, որ զինված բախումների արդյունքում ստեղծված քաոսային իրավիճակում հնարավոր է ավազակային հարձակումներ լինեն։
«Մինչեւ օրս, փառք Աստծո, նման դեպքեր չեն եղել, բայց ամեն դեպքում ինքնապաշտպանական խմբեր գործում են»,- ասաց աղբյուրը՝ ընդգծելով, որ հայ համայնքը եւ Հալեպի քրիստոնյաները ընդհանրապես չեն միջամտում Սիրիայի իշխանության եւ ապստամբ ուժերի բախումներին։
Ըստ նրա՝ հայկական եւ քրիստոնյա բնակչությամբ թաղամասերում իրավիճակը հանդարտ է։ Մարտերը շարունակվում են Հալեպի այն թաղամասերում, որտեղ սուննի մահմեդականներ են ապրում։
Ինչպես ավելի վաղ հայտնել էր TVKET-ը, Սիրիայի Հալեպ քաղաքում երեկ` օգոստոսի 17-ին հրազենային վնասվածքից մահացել էր 76-ամյա Ադելինա Խաչերյանը, իսկ այսօր առավոտյան Դամասկոսում, Բաբ Շարկղի թաղամասում հայկական գերեզմանատան մոտակայքում կառավարական զորքերի եւ ընդդիմադիր զինյալների միջեւ բախումների ժամանակ վիրավորվել էր 38-ամյա Արսեն Ղշփոլադյանը: Հիվանդանոց տեղափոխելուց հետո, սակայն, բժիշկներին չէր հաջողվել փրկել նրա կյանքը: