Մասիսի աղբանոցում այրում են աղբն ու վնասում մարդկանց առողջությունը. բնակիչներ
12:35 10.08.2012
Մասիս քաղաքում աղբանոցի համար հատկացված է 4.9 հեկտար հողամաս, սակայն աղբանոցի սեփականատերը զբաղեցնում է 10-ից ավելի հեկտար հողատարածք, այս մասին Tert.am-ին հայտնեց Մասիս քաղաքի բնակիչներից մեկը, ով 250 մասիսցիների հետ ստորագրահավաք է կազմակերպել և դիմում գրել ՀՀ ԱԺ «Ժառանգություն» խմբակցություն, նշելով, որ քաղաքում ստեղծվել է բնապահպանական աղետալի իրավիճակ:
Նամակում, մասնավորապես բնակիչները նշում են, որ Երևանից ամեն օր Մասիսի աղբանոց է տեղափոխվում կենցաղային աղբ, որը այրվում է, իսկ աղբի այրոցից առաջացած ծուխը վնասում է բնակիչների առողջությունը:
Tert.am–ը մի քանի լրագրողների և ահազանգող բնակիչների հետ այցելեց աղբանոց, որտեղ աղբից իրականում ծուխ էր դուրս գալիս, սակայն տեղում աշխատող բանվորները նշեցին, որ իրենք «միտումնավոր չեն այրում. աղբն իրեն շոգից այրվում է»:
Աղբանոցում նկարահանումներ կատարելու ժամանակ աղբանոց եկավ աղբանոցի սեփականատեր Միշա Հակոբյանը, ով Մասիս քաղաքի նախկին քաղաքապետ Սաշիկ Հակոբյանի եղբայրն է, ում քաղաքապետ աշխատելու ժամանակ էլ աղբանոցի տարածքը հատկացվել է Միշա Հակոբյանին:
Աղբանոցի սեփականատերը տեղում դրսևորեց ոչ ադեկվատ պահվածք, նշելով, որ աղբանոցում ոչ ոք աղբը չի այրում, այլ օրինական նրանք հողածածկումներ են կատարում, իսկ տեղում ծխացող աղբը «մեթան գազի» հետևանք է:
«Ապեր տակը մեթան գազ ա, դրա համար է կրակ դուրս գալիս, ես աֆիցիալնի ասում եմ, բնակչության 70%–ը աղբի փող չի մուծում: Ես էսքանն էլ որ անում եմ ազգի հերոս պետք ա տան ինձ: Ի՞նչ ա, գնացե՛ք Սովետաշենում նայեք. սրանից լավ վիճակո՞ւմ ա»,- ասաց աղբանոցի սեփականատեր Միշա Հակոբյանը:
Նշենք, որ աղբանոցի սեփականատերը աղբանոցի վարձակալության համար տարեկան 58.900 դրամ գումար է վճարում ՀՀ պետական բյուջե:
Ներկայացնում ենք աղբանոցից լուսանկարներ և տեսանյութ: